1Th 1 | KQC | STEP | Mina bura na Paul, Silas ma Timothy yaku — Thessalonica ekalesia vene ya rofu, kaere bi Baba Sei ma Warika Iesu Keriso ideri: Buni toragade ma uka amuta bi yi.

a 1.1:Acts 17.1

b 1.6:Acts 17.5–9

1 Thessalonians 1

1 Mina bura na Paul, Silas ma Timothy yaku — ^a

Thessalonica ekalesia vene ya rofu, kaere bi Baba Sei ma Warika Iesu Keriso ideri:

Buni toragade ma uka amuta bi yi.

Thessalonica vene di vegu ma uka vari gira mana

2 Una bi ari neinei ya vene tau rofu usausa nigasa ya vene fafau Sei rofu buni toragade masifa. 3 Una bi uni Baba Sei di nemokori toga ya mokei baisifa, gokai yi uka vari gira aina moimai yaku moi vata rido, ma gokai yi uka mana yaku yi moimai rei tavoi moi vata rido, ma gokai yi uka mokena uni Warika Amiye Iesu Keriso rofu mina moi gira rido. 4 Usika ourena, una diba Sei yaku ini uka ya mado ma ina yaku ya vo niyo ya bi ini, 5 adina uni ago buni bi ya rofu ago dudu maka de moi baiyafa, idu vava nufa ka, ma vima Kikifa sa ma mokena gira iniye sa. Makai ya ya diba gokai ya sa amegamafa ri vegu reyafa; ya rofu reyafa dada. 6 Ya vene bi una ma Warika Amiye yaku amesifa kana mina reyadi; gokai esikaesika toragade moiyadi, idu Vima Kikifa yaku ada ya vene maro ma ya yaku ago buni moi gira reyadi. ^b 7 Mina ye, ya bi Macedonia ma Achaia gagani di uka vari gira aidedi vene tau yaku veyaganedi kana niyadi. 8 Adina Warika Amiye di ago bi ya rofu Macedonia ma Achaia ri maka de yakuyo, yi uka vari gira aina Sei rofu di sina bi gaganigagani tau ka diba niyadi. Mina resi, minari beika yokoi de nigifa, 9 adina gokai una moi dui reyadi bi iniye niyadi mironi. Ma gokai yabo fore sei rofu kero rei feresi vegu amedo ma rama Sei rofu naivo reyadi ka niyadi. 10 Ma ini Mida oma gutuna dego nari rededi ka niyadi — mina bi ini Mida Iesu, kaere bi muyenari moi dadiyo ma kaere Sei di gubuyo baido rofu uni moi yakugo.